الثلاثاء، 2 أكتوبر 2012

روآية ستظلين في ذاكرتي

روآية ستظلين في ذاكرتي


للكــآتبة / أعقل مجنونة ..



.. ستظلين في ذاكرتي ..
ندى : ولييد هيا امشي بسرعة
وليد : على فين يا ندو
ندى : نطلع السطوح كالعادة بس لحد يشوفك امي ما تدري عني ^_^
وليد : هههه ولا ابوي هيا امشي
وطلعوا للسطوح وكعادتهم يلعبوا كورة ولا شرعت و لا أي شي يتسلوا فيه
ندى ( بنت 4 ابتدائي حبوبه ولزيزة عينها عسلية على عين ام جدتها < يعني وراثة
ووليد يسير ولد خالها عايشة مع امها وابوها سايب امها من يوم عمرها سنة ونص تقريبا )
وليد ( سنة 6 ابتدائي يحب يلعب مع ندى بنت خالته وينبسط مرة معاها وهو اسمر شوية وشعره ناعم مرة وهادئ مرة )
ابو وليد علي وام ندى سارة يسيروا اخوان بس دايم بينهم مشاكل في كل شي وهم ساكنين في عمارة وحدة مع جدة ندى ووليد ( جميلة )
طبعا علي ما يخلي وليد يلعب مع ندى كثير عشان المشاكل اللي بينه وبين سارة ووليد يحب يلعب معاها ودائم يتفقوا بالدس ويطلعوا يلعبوا سوا ومحد يدري ولو دريو يتعاقبوا و ياكلو تهزئي ..
وليد : ندى هي بعدين ابوي وامي يخاصموني
ندى : ايوة صح اصلا وقت الغدا
ونزلو وكل واحد راح لبيته
ام ندى : ندى فين كنتي ؟
ندى حاولت ما تقول الحقيقة : اممم كنت العب يا ماما
ام ندى : تلعبي مع مييين وليد صح شوفي كيف ملابسك اتعدمت وشكلك معدم مرة كم مرة قلت لك لا تلعبي معاه
ندى : ليش يا ماما : (
ام ندى : لمن تكبري تعرفي دحين روحي غيري فستانك وروحي لخالك علي وقوليله الاكل جاهز
ندى : حاضر
وراحت غيرت ملابسها وبعدين على بيت علي وفك وليد لها الباب
ندى : وليد أبوك دري
وليد : للاسف وخاصمني وضربني كمان
ندى : انا اسفه
وليد : مو غلطتك : ) ايش في جاية لنا ؟
ندى : امي تقول يلا الغذى جاهر
ابو وليد دخل فيهم عرض : طيب يا بنتي دحين جين روحي انتي
ندى : طيب
ورجعت لشقتهم ولحقها ابو وام وليد وجلسوا على سفرة الطعام
جدة ندى وأمها في جهة والجهة الثانية وليد وأبوه وأمه
وكالعادة مواضيع روتينية وكلامهم رسمي مرة وكان علي يحترم سارة قدام امه بس
ووليد وندى ساكتين وياكلو بهدوء
ندى : وليد ممكن الملح
وليد : ابشري < شايف نفسه كبير
ندى : شكرا ..
وعلى هذا الحال على فكرة مشاكل علي وسارة تافهة بس هم مكبرينها يعني مشاكلهم عن ابو ندى وزي كذا مشاكل عائلية
بعد سنة تقريبا .
ندى راحت لجدتها تصحيها يوم الجمعة
ندى : جدتيي هيا يا حبيبتي قومي
امل : ندى يا قلبي عليكي نشديلي ابغى اسمع صوتك واشبع منه
ندى مستغربة وسارت تنشد لها : جدتي جدتي حلوه البسمة < اناشيد زمان
ندى : هيا يا جدتي اذن الظهر
امل : ندى قرب مني
قربت منها وجات جميلة اعطتها بوسة على خدها
امل : احبك يا ندى لا تنسيني وخلي همك انك ترضي ربك وامك لا تزعليها
ندى : جدتي اشبك يا قلبي
امل ما ردت عليها وكانت هذي اخر كلماتها ..
انتهى عمرها وندى ما نستها وكيف وهي ماتت قدام عيونها واخر كلامها كان لها
بعد موت الجدة ازدادت المشاكل اكثر واكثر يعني ابو وليد مصر انه سارة ما تاخذ من الورث والجدة خلفت وارها ارث كبير وعلي يقول هو يستحقوا كثر من سارة
ولانه هو اللي يصرف عليها ومن هذا الكلام والمشاكل سارت كبيرة وفي النهاية الحق حق يعني سارة اخذت نصيبها وعلي اخذ نصيبه وبعد كذا علي نقل من البيت وقطع سارة مرة يعني لا كلام بينهم و لا حاجة حتى زيارة ماافي وعلى هذا الحال وندى حزنت مرة لانه وليد هو اللي كان يلعب معاها ويسليها ودحين مافي احد وكل اللي ساكنين معاهم ما عندهم احد في سنها فسارت كل يوم تطلع للسطوح وتلعب لوحدها بالعابهم هناك ..
مرت 7 سنوات وعلي ما يدق على سارة ولا يزورها ولا حاجة قاطعها مرة وندى اتغيرت مرة ووليد كمان بس ندى ماهي فاكرة وليد مرة يعني لمن كبر تغير وهي ناسية شكله
ندى دحين ثاني ثانوي وفي المدرسة اخلاقها عسل ومحبوبة من الكل وتصاحب الكل يعني اجتماعية شكلها تغير مرة عينها عسلية وطلعت احلى وشعرها قصير لحد كتفها وعايشة مع امها وفي نفس العمارة القديمة ما نقلوا منها وما غيرت عادتها كل يومين تطلع السطوح وتلعب كورة وتسلي نفسها واحيانا تنسدح وتستكن واحيانا تجلس ترسم يعني احلى وقتها كان في السطوح
وامها مدرسة فكانت مشغولة عنها يعني مو مرة علاقتهم تمام بس أي شي مضايق ندى تروح لامها وهي تعتبرها صديقتها واختها وامها وكل شي وفي المدرسة عندها 3 صحبات دايم معاها
( اسراء واينو و شهد ) وعلاقتهم كانت تمام مرة
اسراء : احب وحده لندى وهي ماهي نحيفة مرة ولا دبة مرة يعني وسط شعرها لنص ظهرها
وهي تحب تتفاخر احيانا باللي عندها يعني اذا حبت شخص تلاقيها دايم تتكلم عليه وكانت تحب ندى مرة وصديقتها من المتوسطة
ايمان : سمرة سمآر الشرقآوين
شعرها طويل لظهرها مقصقصتهـ
دبدوبة شوي مو مر
شهد : دافووورة وعبقرية مرة تعشق الكمبيوترات واخذه دورات بس متواضعة مرة وطموحة
يوم السبت
ندى : شهووود
شهد : عيوني
ندى : ممكن خدمة صغيرة ابغى انزل برنامج الفيروسات بعد ما فرمت الاب حقي بس مو راضي ممكن تنزليه لي
شهد : اووك بسيطة بس متى
ندى : اممم ايش رايك يوم الخميس الجاي تعالي انتي و اسراء ايمان لبيتي
شهد : مدري امي ترضى ولا لا
ندى : كلميها ان شاء الله توافق
شهد : ان شاء الله
وراحت ندى لاسراء وايمان وقالتلهم وكلهم وافقوا
رجعت ندى للبيت وقالت لامها وهم جالسين يتغذوا
ندى : امي يا قلبي كيف حالك
ام ندى : الحمدلله طيبة وانتي كيفك وكيف المدرسة معاكي
ندى : تماام مرررة ولله الحمد على فكرة اليوم اختبار الرياضيات جبت فيه عشرة
ام ندى : منجد ان شاء الله في كل المواد ربي يوفقك
ندى : امي ممكن طلب
ام ندى : تفضلي
ندى : اممم انا كلمت صحباتي وعزمتهم يوم الخميس
ام ندى : ماشاء الله عزمتيهم قبل لا تكلميني
ندى : بلييييز يا ماما والله اعتبرهم زي اخواااتي يعني كفاية ما عندي اخت والله طفش
ام ندى : هههههه وانا مو زي اختك
ندى : الا بس
ام ندى : بس اييش
ندى : لا و لا شي
ام ندى : خلاص اوك انا موافقة
ندى : شششكرا يا امي ما ننحرم منك يا رب
جا الليل وندى خلصت مذاكرتها وراحت تنام
ام ندى جاتها لغرفتها وانسدحت جمبها وجلست تكلمها
ام ندى : ندى يا بنتي لازم تختاري صحباتك مزبوط و انتبهي لا تثقي فيهم و لا يخربوك وانا واثقة فيكي وواثقة انك عاقلة وفاهمة كلامي زين
ندى : ان شااء الله يا امي والله يا امي اسراء صديقتي من المتوسطة واعرفها مزبوط مرة طييبة وشهد ونهى كلهم طيبين لا تخافي على بنتك
ام ندى : يارب تدوم صحبتكم على خير يلا يا بنتي قومي نامي
وجات تقوم ام ندى
ندى : امي
ام ندى : هلا
ندى : امي ايش المشاكل اللي كانت بينكم
ام ندى : بين مين
ندى : انتي وابوي ليش سابك
ام ندى : ايش جاب الموضوع في بالك دحين
ندى : امممم يعني اسراء زي ما قلت لك اذا حبت واحد لازم تهرج عنه دايم وهي مرة تحب ابوها يعني يمكن هو قريب منها اكثر من امها كمان يا امي هي كل يوم تجرحني وانا ساكتة نفسي اكلمها بس للاسف ما امتلك الجراة
ونزلت دموعها جات امها وضمتها
ام ندى : وبعدين
ندى : وبس يعني حتى طلبت مني اكثر من مرة اكتب لها شعر له او هدية
ام ندى : ندى ابوكي كان طيب مرة ومحبوب ومافيه شي
ندى : طيب ليش سبتيه ؟
ام ندى : اممم بس مشاكل يا قلبي
ندى : مشاكل كيف قوليلي
ام ندى : يا عمري لمن تكبري وتتزوجي تفهمي
واصرت ام ندى ما تقولها اللي بينهم وكان هذا جوابها كل ما تسالها ندى ..
عند شهد ..
شهد : مامي حبيبتي يا قلبي يا عيوني انتي
ام شهد : هاتي من الاخر
شهد : خخخخخ ما ابغى شي بس احبك والله
ام شهد : يعني ما اعرفك ايش بدك طلب
شهد : ابغى طلب بسيييط مرة
ام شهد : ايش ؟
شهد : امي ممكن يعني ممكن بكرة اروح عند صديقتي
ام شهد : يا سلام من متى ما شاء الله
شهد : اسمعي بس يا امي صحبتي ندى
ام شهد : ومين ندى ذي اعرفها ولا لا
شهد : ايوووة شفتيها كم مرة في مجلس الأمهات
ام شهد : اممم شعرها قصير صح
شهد : يب يب عرفتيها ؟
ام شهد : اذا ذيك صحبتك مافي مششكلة ابدا روحي وقت ما تبغي
شهد : منجد !
ام شهد : ايوووة البنت ذي شكلها مرة طيبه وخلوقه صاحبيها واتقربي منها راح تستفيدي وراح تنفعك
شهد : ايوة يا امي هي مرة حبوبه من الكل واخلاقها عسل شششكرا يا ماما
ام شهد : عفوا
ثاني يوم جات شهد المدرسة وهي مبسووطة
شهد : ندى < وسوت نفسها زعلانة
ندى : هلا لا تقووولي ما وافقت
شهد : للاسف : ( وااااااااااافقت
ندى : واااااو غريييييبة هههههههه
شهد : ايوووة هي قالت مدام هي ندى رووحي مافي مشكلة تراها واثقة فيكي
ندى : منجد
شهد : ايوة
ندى : بالله سلمي عليها وقوليلها شكرا , وانتي يا ايمان ؟
اينو : وافقت بعد محاولات بالقووة وافقت والله
ندى : الحمدلله طبعا اسراء اكيد امك وافقت
اسراء : اكيييد تعرفك وتعرف امك راح توافق
ندى : الله يسسعدكم .. متى يجي يوم الخميس متحمسسة مرة بنات ايش تشتهو حلا ترا انواع الحلا عندي كثيييييييير
اسراء : سوي كل اللي تعرفيه وفضي الدولاب والثلاجة
ندى : ههههههههههه اقلبي وجهك بس
شهد : سوي أي شي كل شي منك طعم
اينو : يحنا ذقنا شي عشان تقولي كذا !
ندى طالعت في نهفي ايمان : ايوة ايوة وبعدين ! طيب راح اسوي ومااراح اخليكي تاكلي
اينو : لا لا لالا امزح كل شي طعم
ندى : ههههههههه خلاص يلا كل وحده تطلب اللي تشتهيه
اسراء : هاتو ورقة وقلم خليني املي طلبات
ندى : بس بس محسستني مطعم
الكل : خخخخخخخخ
شهد : خلاص انا ابغى شيز كيك
اسراء : وانا امممم فطيرة تفاح
اينو : وانا حلا بالشوكلاته
ندى : من عيوووني وراح اسوي مية حاجة كمان
اسراء : ترا نمزح ما يحتاج هذا كله محنا اجانب
ندى : احلا يالاجانب ههههه
شهد : منجد نهرج
ندى : خخخ ما عليكم هذي فرصة ما تتكرر دايم
اينو : جزاك الله خير : )
رجعت ندى للبيت وقالت لامها ان البنات وافقوا
ام ندى : اوك ايش راح تسوي ؟
ندى : اللي دايم اسويه مامي دحين ابغى اذاكر وفي العصر طالعة السطوح
ام ندى : اوك حبيبتي
وراحت ندى لمذاكرتها وجلست تذاكر
وبعد العصر طلعت للسطوح على فكرة قبل اسبوع جاهم جيران جدد وساكنين في اخر دور يعني لو فتحو الطاقة راح يشوفو السطوح وندى ما انتبهت لهذا الشي مرة
وعادي كل يوم تطلع الين تطفش وتنزل وكان الوضع تمام مرة ولا احد فتح طاقة ولا حاجة ..
يوم الخميس طبعا جمعت صحباتها وجهزت كل شي وكانت متحمسة مرة اول مرة يجوها من بداية السنة
بعد المغرب جاتها اسراء اول وحده
ندى : هلا اسرااااااء
اسراء : اهلييين ندو
ندى : كالعادة ماشاء الله اول من يصل
اسراء : يب اكيييد
ندى : جيتي مع مين
اسرء : بابتي الله يخليه
ندى : الله يخليه لك وابتسمت لها
اسراء : تصدقي ويحنا جاين جالسة احكيه عليكي وعلي في المدرسة والمقالب وكل حاجة
ندى : هههههه ما بقيتي ولا خليتي
اسراء : اما اخلي حاجة على ابوي قولي امي ممكن بس ابوي لا
ندى : خخخخخ انا مع امي دايم
اسراء مرة تحب ابوها ودايم تهرج عنه وندى تنجرح عشان تتمنى يكون لها ابو زي ما للبنات اباء
حاولت تغير الموضوع بسرعة
ندى :البنات لسى ما جو
شوي دق الجرس قامت تفتح
اينو : السسسسسسلام عليكم
ندى : اهليييييييييين اينووو تفضضضلي
اينو : تسلمي يا عسسل
وخمس دقايق وجات شهد كمان
شهد : سلاااام
ندى : هلا والله تفضلي
وجلسو سوا وشوي جات ام ندى وقاموا البنات وسلموا عليها وجلست معاهم شوية وقامت بعدين
شهد : ندوووو فين الاب حقك تراني جاية عشانة موع شانك
ندى : ههههههه يا نذلة انتي خلااص خذي سويه والله معاكي مافي حلا حتى عصير ماراح اعطيكي
شهد : هههههه لاوالله امزززح بس هاتي الاب تراني طفششانة
ندى : اوك دقايق بس
وراحت جابت الاب حقها وجلست عليها شهد حق نص ساعة
ندى بطفش : شهوووده ما خلصتي ايش تسوي انتي
شهد : ههههه خلصت دوبي
ندى : ششكرا
اينو : بنات امشو نلعب لعبة
اسراء : ايش نلعب
اينو : ايش رايكم نلعب باصرة عندك ؟
ندى : لا والله
اينو : اجل انا معي
وطلعتها من شنطتها
اسراء : يا سلام مجهزة كل شي
اينو : خخخخ ايوة يا ستي ما اخرج الا بيها وبعدين يحنا جمعة بنات المفروض يا ندى تجيبي باصرة
ندى : اسفة يا ماما معد اعيدها
وجلسوا يلعبوا سوا وفي نص اللعب قامت ندى وجابت شبسات وحلويات وعصير
اينو : تسلمي يا قمر
ندى : الله يسلمك لا تكوني لعبتم استنو
شهد : لا ما لعبنا نستناكي
ندى : اوك هيا نكمل
وكملوا اللعب وفي الاخر اينو خسرت
ندى : يلا بنات كل وحده تحكم عليها
شهد : قومي يا حبيبتي وجيبي الحلا اللي سوته ندى بلاشي نتعبها
اينو : بس كذا دقايق طيب
وراحت للمطبخ وجابت الاكل
اسراء : دووري اممم جيبي كاسة موية
اينو : بس ايش هذا ما عندكم احكام
ندى : ماعندي حكم بس راح اسال سؤال اوك
اينو : اوك
ندى : قد حبيتي
اينو : هههههههههههههههه
ندى : هههههههه سلاامات قلت نكتة ؟
اينو : لا بس افتكرت لمن كنت صغيرة واستبله واقول اني احب ولد الجيران
ندى : حركااات يا دوبا
اينو : هع اقولك احب ولد الجيران بس استهبال
شهد : بنات انا واسراء راح نخلص الشيبس امشو كلو معانا
اينو : ههههههه لا لا خلولنا الله يخليكم
اسراء : نمزح بس تعالو كلو
وجلسوا ياكلوا سوا ..
بس اينو تغيرت شوية بعد ماجاها سؤال ندى وندى لاحظت بس ما تبغى تحرجها فسابتها ..
وعلى الساعة 12 خرجو من عند ندى وراحت لغرفتها طبعا امها نامت من اول
وهي جلست على سريرها واخذت دفترها الخاص وجالسة تكتب فيه
( اليوم كان من احلى الايام صحباتي جو عندي وانبسطت مرة معاهم واتسلينا وقالوا على طبخي طعم يارب نكون مع بعض للابد بس في حاجة نفسي اقولها لاعز صحباتي اسراء بس ماني عارفة كيف اقولها ولا اصلا ما يحتاج انا من بداية ما صاحبتها دريت انها قريبة مرة من ابوها وتحبه ويحبها وكانت دايم تهرج عنه وهذا شي يجرحني وصعب علي انا ابوي سايب امي من كم سنة ولا عمره كلمنا ولا زارنا ولمن اسالي امي تقول اقولك لمن تكبري يااه منجد اتمنى يجي يوم واضمه واسلم عليه واقوله احبك وكمان اكتب فيه خواطر وكمان اجيب له هدايا بس هذا شي مستحيل حتى اني اتمنى يكون لي اخت دايم معايا في كل مكان في البيت وفي المدرسة صحباتي الله يخليهم ما قصرو معي وهم زي اخواتي بس برضوا اتمنى لي اخت
الله يهديكي يا اسراء يارب تخفي شوي وما تهرجي عنه كثير خايفة اقولك واجرحك وبعدين انا اخاف تدمع عيني وانا اكلمك وهذا الشي مرة ما ابغاه ما ابغى احد يشوف دموعي اظن كذا يكفي يلا انا ابغى انام
صح نسيت قبل كم اسبوع سكنو جيران جدد وما جو زارونا نفسي اعرف مين هم ومين عندهم يعني عايلة فيها بنات ولا بس اولاد ولا كيف ما ادري ان شاء الله اكلم امي تعزمهم يوم عندنا يلا تصبحو على خير )
في المدرسة
ام ندى راحت لمدرستها وكانت تدرس الابتدائي وندى راحت لمدرستها
ندى : السلام عليكم كيفكم بنات
شهد : الحمد لله بخير
اينو : وكيفك انتي
ندى : تمام فينها اسراء اتاخرت مو من عادتها
شهد : ايوة مدري اشبها
اينو : عبل ما تجي امشوا نتمشى في الساحة
ومشيوا سوا وجالسين يهرجوا ويضحكوا
ندى : بنات قلتلكم على جيراننا الجدد
شهد : لا والله ما قلتي
ندى : جو ناس سكنو عندنا من قبل شهر وانا اتخدع امي عشان تعزمهم ابغى اعرفهم واعرف طبعهم واصلهم وفصلهم
اينو : ملقفة ما تبطليييها
ندى : لا مو ملقفة هذي بس ابغى اعرف مين هما يعني المفروض اذا عرفوا انو يحنا اصحاب البيت المفروض يزورونا ويسلمو علينا وما يحتاج لعزيمة
ايمان : ههههههههههه اصبري شوي وراح يجوكم
ندى : ايوة يا اينو فاكرة قبل امس يوم قلتي تحبي ولد الجيران منجدك
شهد : اووو حركاات
ايمان : هههههههههههههه قلتلكم بس استبله اصلا انا ما احب ولا ودي احب وليش يختي اعلق نفسي بواحد
وبعدين ما اكون معاه
ندى : خخخخ طيب هو لسى عايش معاكم
ايمان : لا طبعا هو نقل ويحنا نقلنا اقولك زمان يعني يمكن حب طفولي بس وحق اللعب
ندى على طول افتكرت وليد وافتكرت كيف يلعبوا سوا : اها
شهد : بنات دق الجرس واسراء ماجات
ندى : يمكن سار لها عذر وبتتاخر خلينا نطلع ونستناها
طبعا وقفوا في الطابور وجالسين ينشدوا النشيد الوطني بس طبعا ندى وشهد واينو يضحكو وما ينشدوا وكل يوم ياكلوا تهزيئ
طلعوا على الفصل وبرضوا اسراء ماجات وجات معلمة الغياب وكتبت عليها غياب
بعد ما رجعت البيت ندى على طول دقت على اسراء بس ما ترد عليها
استنت للعصر ودقت ثاني
اسراء : الو
ندى : الووو اسراء كيفك
اسراء : الحمد لله
ندى : اشبك غايبة سلامات .؟.؟
اسراء : تعبانة مرة
ندى : تعبانة ايش فيكي ما تشوووفي شر
اسراء : فيني سخونة وبس استفرغ
ندى : الله يشفيكي طيب رحتي للمستشفى ؟
اسراء بدت تبكي : رحت يا ندى رحت
ندى : وايش قالوا اششبك تبكي يا عمري
اسراء : قالوا لازم عملية









التوقيع
اضغط على الصورة لرؤيتها بالحجم الطبيعي

ليست هناك تعليقات:

إرسال تعليق